Fréttir

         Kæru foreldrar og börn                                            Ungmennaráð Unicef á Íslandi og SAMTAKA á Akureyri ætla að standa fyrir leikfangaskiptimarkaði fyrir börn laugardaginn 22. mars á Glerártorgi frá kl. 13-17.   (Markaðurinn verður í bilinu þar sem verslunin Ice in a bucket var) Markmiðið með skiptimarkaðinum er að fá börn til að nýta leikföngin sín betur og læra um umhverfisvæn sjónarmið og sjálfbærni. Á staðnum geta þau einnig fengið fræðslu um Barnasáttmálann og réttindi sín hjá Ungmennaráði Unicef. Börnum verður boðið að koma með leikföng, spil eða bækur sem þau eru hætt að nota og láta þau í skiptum fyrir notaða hluti frá öðrum börnum. Þannig geta notaðir hlutir öðlast nýtt líf í höndunum á nýjum börnum. Til að þetta verkefni geti orðið að veruleika, langar okkur að biðla til ykkar um að leggja okkur lið við að koma upp safni notaðra leikfanga/bóka/spila. Guðrún og Begga á skrifstofu Naustaskóla munu taka á móti leikföngum og stimpla kort. Við munum hefja söfnun á miðvikudagsmorgni 19/3 og til seinniparts á föstudeginum 21/3.Það er von okkar að þið takið vel í bón okkar og við sjáumst jafnframt á Glerártorgi. Ath: þetta fer þannig fram, að börnin geta komið með leikföng á skrifstofu skólans og fá stimpil í kort í staðinn. Síðan geta þau valið sér leikföng á skiptimarkaðnum og þar gildir, einn stimpill = einn hlutur. Eða komið með leikföng á skiptimarkaðinn sjálfan og fengið önnur í staðinn. Endilega takið þátt og gætið þess að leikföng/spil/bækur séu hrein og heil.

Fréttabréf marsmánaðar er komið út og má nálgast það hér.. Svo minnum við á að dagana 5.-10. mars er vetrarfrí hjá nemendum.  Frístund er opin dagana 5.-7. mars en mánudaginn 10. mars er skólinn lokaður þar sem allt starfsfólk verður í heimsóknum í öðrum skólum, norðan heiða og sunnan.  

Mánudaginn 3. mars verður haldið ball fyrir nemendur í 1.-4. bekk kl. 17:00-19:00.  Prýðilegt tækifæri til að máta öskudagsbúninginn!!  Aðgangseyrir er 500 kr. og sjoppan verður opin.  Ágóði rennur í ferðasjóð 10. bekkjar.  

Þjálfun í samskiptum, tilfinningastjórn og athygli barna með ADHDFjölskyldudeild Akureyrarbæjar býður börnum með ADHD að taka þátt í námskeiði til að efla færni á ýmsum sviðum. Námskeiðið er fyrir börn fædd árið 2004 og 2005 og eru 6 börn í hverjum hóp. Áhersla er lögð á að auka færni barna í félagslegum samskiptum, skapstillingu, sjálfsstjórn og að bæta athyglisgetu þeirra. Hópurinn hittist tvisvar í viku 2 tíma í senn, í 5 vikur (10 skipti alls) með tveimur þjálfurum. (Þetta námskeið verður 10. mars-9. apríl 2014 á mánudögum og miðvikudögum kl. 16:15-18:15)  Umsóknarfrestur er til 24. febrúar.  Nánari upplýsingar má nálgast hér..

Föstudagurinn 21. febrúar er hinn árlegi "nemendadagur" í Naustaskóla. Það þýðir að þennan dag tekur nemendaráð völdin í skólanum og skipuleggur skólastarfið eftir eigin höfði.  Að þessu sinni hefur nemendaráð ákveðið að það skuli vera svokallað "glæsiþema" sem þýðir að mælst er til þess að allir mæti í sínu fínasta pússi eða að minnsta kosti mjög glæsilega til fara!  Svo er að sjálfsögðu frjálst nesti og um að gera að koma með snakk og safa eða djús en hluta dagsins verður auðvitað bíó. Nemendaráð hefur hins vegar ákveðið að ekki sé í boði að koma með gos eða sælgæti. Dagurinn er síðan styttri en vanalega því að nemendur fara heim (eða í Frístund) að afloknum mat um kl. 11:45. 

Nú stendur yfir innritun í grunnskóla fyrir næsta skólaár og hafa foreldrar barna sem fædd eru árið 2008 fengið póst vegna þess.  Á sama tíma hvetjum við foreldra sem hyggja á flutninga eða skólaskipti fyrir börn sín að nýta þennan tíma til innritunar, en innritun þarf að vera lokið 24. febrúar nk. Miðvikudaginn 12. febrúar 2014 verður opið hús í Naustaskóla frá kl. 9:00-11:00 fyrir forráðamenn og nemendur sem hefja skólagöngu næsta skólaár. Allar upplýsingar um skólaval og umsóknareyðublöð vegna skólavistar má finna á síðum Skóladeildar undir hlekknum:  http://www.akureyri.is/skoladeild/moya/page/skoalval-grunnskola Við bjóðum alla sem vilja kynna sér skólann velkomna!

Þriðjudaginn 11. febrúar 2014er áætlað að nemendur Naustaskóla fari í Hlíðarfjall til að njóta samveru og útiveru ef veður leyfir. (Ef ekki viðrar verður gerð önnur tilraun þann 12. febrúar) Þeim nemendum sem ekki geta farið í fjallið af einhverjum ástæðum  verður boðið upp á afþreyingu í skólanum. Nemendur mæta eins og venjulega kl. 8:10 Farið verður frá skólanum sem hér segir:  4.-10. bekkur kl. 08:20   en  1.-3. bekkur kl. 09:00 Lagt verður af stað úr Hlíðarfjalli sem hér segir: 1. – 3. bekkur kl. 11:20  en   4.-10. bekkur kl. 12:00 Þegar komið er í skóla aftur verður matur samkvæmt venju en eftir það fara nemendur heim eða í Frístund, nema að kennsla verður í valgreinum í 8.-10. bekk.  Nemendur í 4.-10. bekk geta fengið lánaðan búnað endurgjaldslaust en nemendur í 1.-3. bekk geta því miður ekki fengið lánaðan búnað en er velkomið að hafa með sinn eigin búnað eða snjóþotur og sleða. Útbúnaður: Skíði, bretti, snjóþotur, þoturassar, svartir plastpokar og sleðar eru leyfðir til fararinnar. Hjálmar eru nauðsynlegir! (Bent er á að hægt er að nota reiðhjólahjálma) Mikilvægt er að nemendur séu vel klæddir og í vel merktum fatnaði. Ekki gleyma snjóbuxunum, vettlingunum eða húfunni. Nesti: nemendur komi sjálfir með hollt og gott nesti. Sjoppa er ekki opin.  Nemendur fá afhent lyftukort þegar þeir mæta á svæðið. Ef nemendur óska eftir að verða eftir í fjallinu þegar dagskrá lýkur þurfa foreldrar að hafa óskað eftir því við umsjónarkennara eða ritara skólans. Lyftukortin gilda allan daginn en skila þarf lánsbúnaði eða semja um leigu á honum.    Ekki er hægt að bjóða upp á skíðakennslu en við munum aðstoða nemendur eins og kostur er.   Útivistardagurinn er með öllu gjaldfrjáls fyrir nemendur. Starfsfólk Naustaskóla

Heilsugæslustöðin á Akureyri býður upp á námskeið fyrir foreldra barna sem eru yngri en 10 ára og í ofþyngd. Markmiðið er að hjálpa fólki að breyta lífsstíl fjölskyldunnar til betri vegar. Námskeiðið er fjórir hóptímar og þrjú fjölskylduviðtöl. Miðað er að því að námskeiðið auðveldi foreldrum að búa til venjur, reglur og siði sem styðja við heilbrigðan lífsstíl ásamt því sem veitt eru ýmis gagnleg ráð sem tengjast næringu og hreyfingu. Hóptímarnir verða á þriðjudögum kl. 16.30-18.00 og byrja 18. febrúar 2014 ef næg þátttaka fæst. Leiðbeinendur eru Hrafnhildur Ævarsdóttir hjúkrunarfræðingur í ungbarnavernd og Þórdís Rósa Sigurðardóttir hjúkrunarfræðingur og einkaþjálfari.  Verð fyrir námskeiðið er 6.000 kr. Skráning og nánari upplýsingar: Hrafnhildur: gsm 6927040 eða hrafnhildur@hak.ak.is Þórdís Rósa: gsm 8991099 eða heilsulund@akmennt.is

Þá er fréttabréf febrúarmánaðar komið á vefinn og má nálgast það hér...