Fréttir

Við minnum á að hérna á vefsíðunni má nálgast ýmis gögn sem lúta að mati á starfinu í skólanum okkar.  Síðustu gögnin sem bættust þar við eru niðurstöður læsisprófa í 1. og 2. bekk og svo niðurstöður úr foreldrakönnun Skólapúlsins sem lögð var fyrir á dögunum.  Þar sjáum við í fyrsta sinn birtast mat og viðhorf forelda til starfsins í skólanum, borið saman við niðurstöður í meirihluta grunnskóla landsins, og er afar ánægjulegt að greina frá því að Naustaskóli kemur mjög vel út í þeim samanburði.  Til að nálgast þessi gögn er hægt að smella á "skólinn" í stikunni hér efst á síðunni, og síðan á "matsgögn/skýrslur" eða bara smella hér...

Fréttabréf aprílmánaðar er komið út og má nálgast það hér....

Nú er skóladagatal næsta skólaárs komið á vefinn hjá okkur. Við vekjum þó athygli á því að það er birt með fyrirvara vegna þess að það á eftir að fara fyrir skólanefnd og því ekki útilokað að einhverjar breytingar kunni að verða...  En hægt er að smella hér til að skoða hvernig næsti vetur lítur líklega út :)

Kennsla að loknu páskafríi hefst skv. stundaskrá þriðjudaginn 2. apríl. Vonandi hafa það allir ljómandi gott í páskafríinu og mæta sprækir til starfa að nýju... :)   Gleðilega páska!

Seinni hluti aðalnámskrár grunnskóla fyrir einstök greinasvið hefur verið birtur sem rafræn útgáfa á vefsíðu menntamálaráðuneytisins. Honum er bætt aftan við almenna hluta námskrárinnar sem heitir nú: Aðalnámskrá grunnskóla almennur hluti 2011 og greinasvið 2013. Lögformleg útgáfa verður birt í stjórnartíðindum fljótlega. Útgáfa aðalnámskrár fyrir greinasvið grunnskóla er lokaáfangi í heildarendurskoðun á aðalnámskrám fyrir leik-, grunn- og framhaldsskóla sem hófst í kjölfar heildarendurskoðunar laga fyrir þessi skólastig.  Hér má nálgast aðalnámskrána....

Þann 20. mars er haldið upp á Alþjóðlega hamingjudaginn að frumkvæði Sameinuðu þjóðanna. Vakin er athygli á því að í tilefni dagsins hefur embætti landlæknis gefið út „Fimm leiðir að vellíðan“ sem fela í sér einföld skref fyrir unga sem aldna til að auka hamingju og bæta líðan. Þessar fimm leiðir eru eftirtaldar: Skapaðu tengsl Hreyfðu þig Taktu eftir Haltu áfram að læra Gefðu af þér Veggspjald með nánari upplýsingum um þessar ágætu vörður á leiðinni til hamingjunnar má nálgast hér...

Laugardaginn 16. mars kl. 14:00-16:00 verður Legó-hátíð í Naustaskóla til fjáröflunar Lego-liði skólans, en eins og kunnugt er heldur liðið til keppni í Þýskalandi þann 6. maí nk. og stendur því fyrir fjáröflun þessa dagana. Aðgangseyrir verður 500 kr. og verður boðið upp á vöfflur, kaffi/djús, tónlist, vélmennasýningu og leiksvæði fyrir börnin.  Einnig verður happdrætti þar sem gestir geta unnið gjafabréf og varning frá ýmsum fyrirtækjum bæjarins.  Er þar um að ræða ýmsa góða vinninga og kostar miðinn í happdrættinu 500 kr.  Allir velkomnir!!

Miðvikudaginn 13. mars 2013 er áætlað að nemendur Naustaskóla fari í Hlíðarfjall til að njóta samveru og útiveru. Þeim nemendum sem ekki geta farið í fjallið af einhverjum ástæðum  verður boðið upp á afþreyingu í skólanum. Nemendur mæta eins og venjulega kl. 8:10 Farið verður frá skólanum sem hér segir:  4.-10. bekkur kl. 08:20   en  1.-3. bekkur kl. 09:00 Lagt verður af stað úr Hlíðarfjalli sem hér segir: 1. – 3. bekkur kl. 11:20  en   4.-10. bekkur kl. 12:00 Þegar komið er í skóla aftur verður matur samkvæmt venju en eftir það fara nemendur heim eða í Frístund, nema að kennsla verður í valgreinum í 8.-10. bekk.  Nemendur í 3.-10. bekk geta fengið lánaðan búnað endurgjaldslaust en nemendur í 1.-2. bekk geta því miður ekki fengið lánaðan búnað en er velkomið að hafa með sinn eigin búnað eða snjóþotur og sleða. Útbúnaður: Skíði, bretti, snjóþotur, þoturassar, svartir plastpokar og sleðar eru leyfðir til fararinnar. Hjálmar eru nauðsynlegir! (Bent er á að hægt er að nota reiðhjólahjálma) Mikilvægt er að nemendur séu vel klæddir og í vel merktum fatnaði. Ekki gleyma snjóbuxunum, vettlingunum eða húfunni. Nesti: nemendur komi sjálfir með hollt og gott nesti. Sjoppa er ekki opin.  Nemendur fá afhent lyftukort þegar þeir mæta á svæðið. Ef nemendur óska eftir að verða eftir í fjallinu þegar dagskrá lýkur þurfa foreldrar að hafa óskað eftir því við umsjónarkennara eða ritara skólans. Lyftukortin gilda allan daginn en skila þarf lánsbúnaði eða semja um leigu á honum.    Ekki er hægt að bjóða upp á skíðakennslu en við munum aðstoða nemendur eins og kostur er.   Útivistardagurinn er með öllu gjaldfrjáls fyrir nemendur. Starfsfólk Naustaskóla

Fréttabréfið og matseðilinn fyrir marsmánuð má nú nálgast hér...