Fréttir

Á dögunum barst Naustaskóla höfðingleg gjöf frá fjórum nemendum skólans en þar er um að ræða safn fugla sem eru til sýnis í skápum við náttúrufræðistofu skólans.  Gjöfinni fylgdi skjal með svohljóðandi texta: "Hér með er Naustaskóla fært að gjöf safn fugla sem afi okkar, Stefán Baldursson, safnaði og stoppaði upp. Tilgangur gjafarinnar er að vekja áhuga nemenda skólans um náttúru Íslands og stuðla að aukinni vitund þeirra um það fjölskrúðuga fuglalíf sem hér á landi er. Í safninu má finna 25 fugla, bæði stóra og smáa.  Með kærri kveðju og von um ys og þys við fuglaskápinn, Monika Birta og Friðrika Vaka Baldvinsdætur, Atli og Baldur Ásgeirssynir" Við þökkum kærlega fyrir þessa góðu gjöf og hvetjum alla til að gefa sér góðan tíma til að skoða safnið. Hér má sjá nokkrar myndir af safninu..

Árshátíð skólans þann 21. nóvember tókst aldeilis prýðilega og fór í alla staði vel fram.  Við notuðum tækifærið um morguninn og héldum upp á 5 ára afmæli skólans með því að rifja upp gamla tíma og skoða m.a. myndir og myndbönd frá fyrstu árum skólans.  Því næst var hátíðleg stund þar sem nemendur gæddu sér á kökum og kakói og að því loknu mætti Magni Ásgeirsson til okkar og reif svo sannarlega upp stemminguna með kröftugum söng.  Þá gæddum við okkur á lambasteik að hætti hússins og eftir hádegið voru svo sjálfar árshátíðarsýningarnar og kaffihlaðborðin svignuðu undan kræsingunum.  Hér má sjá nokkrar myndir frá deginum, takk kærlega fyrir góðan dag!

Nemendur í 1.-3. bekk fengu góða heimsókn í síðustu viku en þá kíkti hann Ævar vísindamaður við hjá okkur og las fyrir krakkana úr bók sinni, "Þín eigin þjóðsaga".  Smellið hér til að sjá nokkrar myndir frá heimsókninni..

Guðbjörg Ringsted afhenti í gær Akureyrarkaupstað að gjöf málverkið Flögrandi (90x90 sm) sem þakklætisvott fyrir þann heiður sem henni var sýndur með því að hafa verið valinn bæjarlistamaður 2012-2013. Eiríkur Björn Björgvinsson bæjarstjóri veitti verkinu viðtöku á Listasafninu á Akureyri en málverkinu hefur þegar verið valinn staður í Naustaskóla. Guðbjörg sagði við þetta tækifæri meðal annars að titillinn bæjarlistamaður hafi verið henni talsverð lyftistöng og auðveldað henni að koma sér á framfæri sem listamanni. Við í Naustaskóla þökkum einnig fyrir þann sóma sem okkur er sýndur með því að okkur er falið þetta fallega verk til varðveislu. 

Vika 43, forvarnaverkefni Samstarfsráðs um forvarnir, hófst mánudaginn 20. október.  Í vikunni er kastljósi beint að ýmsu er varðar félagsstarf meðal barna og ungmenna, lífsstíl og sjálfsmynd og vakin athygli á því góða starfi með ungu fólki sem lítur að forvörnum í nærsamfélaginu. Alla daga vikunnar verður vakin athygli á virkri þátttöku barna og ungmenna í hvers kyns íþrótta-, félags- og tómstundastarfi. Á umliðnum árum hefur þátttaka í skipulögðu félagsstarfi stóraukist með öflugum félagasamtökum og bættri aðstöðu, er það ótvírætt grunnurinn í þeim góða árangri sem náðst hefur í forvörnum.   Með eflingu félagasamtaka og félagsstarfs sem stendur börnum og foreldrum þeirra til boða hefur það einnig gerst að úrræðin hafa færst nær þátttakendum og heimilum þeirra og þannig fært fólkinu í heimabyggð meiri ábyrgð og hlutdeild í forvarnastarfi.  Árangurinn er eftir því svo góður að eftir er tekið innanlands og utan.Nánari upplýsingar um verkefnið má nálgast á heimasíðu Viku 43 www.vika43.is