Fréttir

Föstudaginn 20. mars er áformaður útivistardagur í Naustaskóla (ef veður leyfir) þar sem okkur býðst að fara í Hlíðarfjall.  Þeim nemendum sem ekki geta farið í fjallið af heilsufars- eða öðrum mjög brýnum ástæðum verður boðið upp á afþreyingu í skólanum.  Nemendur í 4.-10. bekk geta fengið lánaðan búnað endurgjaldslaust en nemendur í 1.-3. bekk geta því miður ekki fengið lánaðan búnað en er velkomið að hafa með sinn eigin búnað eða snjóþotur og sleða.  Við komuna í fjallið fá nemendur lyftukort sem gilda allan daginn og geta eldri nemendur nýtt sér það ef vilji er til, en athugið að skila þarf inn lánsbúnaði um hádegi, þegar rútur á vegum skólans fara heim.  Ef nemendur óska eftir að verða eftir í fjallinu þegar dagskrá lýkur þurfa foreldrar að hafa óskað eftir því við umsjónarkennara eða ritara skólans með símtali eða tölvupósti. Athugið að nemendur eru þá á eigin vegum eftir að rútur skólans eru farnar. Þegar nemendur koma til baka í skólann fá þeir hádegisverð en fara að því búnu heim (eða í Frístund ef þeir eru skráðir þar) Tímasetningar: 1.-3. bekkur:  Mæting í skóla kl. 8:10 Brottför frá skóla kl. 8:30 Heimferð úr Hlíðarfjalli kl. 11:15 Skóladegi lýkur kl. 12:00 4.-7. bekkur:   Mæting í skóla kl. 8:10 Brottför frá skóla kl. 8:15 Heimferð úr Hlíðarfjalli kl. 12:00 Skóladegi lýkur kl. 12:45 8.-10. bekkur  Mæting í skóla kl. 8:50 Brottför frá skóla kl. 9:00 Heimferð úr Hlíðarfjalli kl. 12:40 Skóladegi lýkur kl. 13:20 Útbúnaður:Skíði, bretti, snjóþotur, þoturassar, svartir plastpokar og sleðar eru leyfðir til fararinnar. Hjálmar eru nauðsynlegir! (Bent er á að hægt er að nota reiðhjólahjálma) Mikilvægt er að nemendur séu vel klæddir og í vel merktum fatnaði. Ekki gleyma snjóbuxunum, vettlingunum og húfunni. Nesti: nemendur komi sjálfir með hollt og gott nesti. Sjoppa er ekki opin. 

Nemendur Naustaskóla, þau Sunna Björk og Alexander, voru fulltrúar félagsmiðstöðvarinnar Tróju í söngkeppni Samfés sem fram fór um síðustu helgi og stóðu þau sig að sjálfsögðu eins og hetjur.  Á slóðinni hér á eftir má sjá myndband frá keppninni, smellið hér:  http://www.visir.is/section/MEDIA99?fileid=CLP34497   

Miðvikudagurinn 11. mars var mikill keppnisdagur en þá fóru fram bæði Skólahreysti og lokahátíð Stóru upplestrarkeppninnar í 7. bekk.  Naustaskóli átti að sjálfsögðu fulltrúa í báðum þessum keppnum, í Skólahreysti kepptu þau Bjarney Sara, Crispin Tinni, Heiðar Örn og Una Kara en í upplestrinum voru þau Arnór Ísak og Íris okkar fulltrúar.  Ekki náðum við verðlaunum í hús í þetta skiptið en fulltrúar okkar í báðum keppnunum stóðu sig með mikilli prýði og voru skólanum okkar til sóma.  Takk fyrir það! 

Ákveðið hefur verið að breyta fyrirkomulagi á miðstigsopnunum félagsmiðstöðvarinnar Tróju.  Í stað þess að um sé að ræða eina opnun í mánuði í hverjum skóla, mun framvegis vera opnun í Tróju í Rósenborg, alla fimmtudaga kl. 14:30-16:00.  Nemendur í 7. bekk eru ennfremur minntir á að opið er fyrir þá alla miðvikudaga kl. 14:30-16:00 í Tróju - Rósenborg. 

Opnað hefur verið fyrir tilnefningar til Foreldraverðlauna Heimila og skóla fyrir árið 2015. Skólafólk og foreldrar sem vita um metnaðarfullt foreldrastarf sem eflt hefur samstarf foreldra, nemenda og skólafólks og stuðlað að jákvæðum samskiptum heimilis og skóla eru hvött til að láta vita af því. Hægt er að tilnefna verkefni hér: http://www.heimiliogskoli.is/2015/03/foreldraverdlaun-heimilis-og-skola-2015/ Markmið Foreldraverðlauna Heimilis og skóla er að vekja athygli á því gróskumikla starfi sem fer fram innan leik-, grunn og framhaldsskóla, og þeim mörgu verkefnum sem stuðla að öflugu og jákvæðu samstarfi heimila, skóla og samfélagsins.