Síðustu vikur hafa einkennst af blíðskapaveðri. Nemendur eru búnir að vera á ferð og flugi og notið meiri útiveru en á hefbundnum skóladögum. Einnig hafa þau tekið þátt í íþróttamótum, farið á leiksýningar og svo fór 10.bekkur í sitt hefbundna skólaferðalag. Allir nemendur hafa síðan farið í ísferð með sínum kennurum í boði foreldrafélagsins. Þessa síðustu viku af skólaárinu má reikna með kalsa veðri en við látum það ekki á okkur fá og högum þeim dögum eftir því og stefnum að UNICEF hlaupinu á mánudaginn og vonum við að veðrið leiki við okkur þann dag.
Í Naustaskóla er lögð rík áhersla á tilfinningalega heilsu og vellíðan nemenda, enda er það hornsteinn velferðar þeirra í lífinu. Skólinn leggur sig fram um að mæta hverjum nemanda á hans eigin forsendum og veita þann stuðning sem þarf til að efla þroska og velferð. Í vor munu 42 nemendur útskrifast úr 10. bekk. Þó að breytingar geti valdið óöryggi, bæði hjá nemendum og foreldrum, sýnir reynslan að nemendur Naustaskóla standa sig yfirleitt vel á næsta skólastigi. Skólinn hefur lagt góðan grunn að framtíð þeirra með áherslu á tilfinningalega og félagslega færni, sem mun nýtast þeim vel á nýjum vettvangi.
Nokkrir af starfsmönnum okkar hverfa á braut eftir þetta skólaár í önnur verkefni og óskum við þeim velfarnaðar á nýjum vettvangi. Enn er unnið að því að ráða inn kennara og rétt að nefna að nýr húsvörður Eiríkur H. Kjerúlf hefur tekið til starfa og hefur Vignir látið af störfum.
Að lokum kæru foreldrar viljum biðja ykkur um að fylgjast með leik barnanna á leikvelli skólans í sumar og leiðbeina þeim á jákvæðan hátt geri þau mistök í samskiptum við önnur börn. Við fullorðna fólkið erum fyrirmyndir barnanna okkar bæði í leik og starf.
Við óskum ykkur öllum gleðilegs sumars og hlökkum til að hitta ykkur á nýjan leik í haust, tilbúin í ný verkefni á nýju skólaári.
Stjórnendur og starfsfólk Naustaskóla
